مربعات الشاعر
حسين السّوهاجي
عن الشّعر قال:
طرح السّواقي أحاسيس
وشعوره ناعمه ورقيقه
يكفينا شر المداسيس
بيزوّدا نار الحريقه.
ــــــــــــــــــــــــــ
الطّرح لوجه لموجوع
يمكن يخفف من آلامه
واللي بيسرق من الجّوع
ع السّرقه ما حد لامه.
ــــــــــــــــــــــــ
الشّعر مش شي ترفيه
لكل حابل ونابل
ولا توب طويل حترفيه
الشّعر زي القنابل.
ــــــــــــــــــــــــ
يااللي إنت شاعر ودكتور
تدري الأدب والرجوله
فارس بقلمك وداك تور
ينطح وترفس رجوله.
ـــــــــــــــــــــــ
وعن المقاومه قال :
القدس أرض النّبوّات
مهد المسيح ف الطّفوله
ياما فيها بيّن نبوات
يا عربنا فين الرّجوله.
ـــــــــــــــــــــــ
الدّم سايل في غزّه
فيضانه غطّى الأراضي
وعربنا قاعدين ف غرزه
والكل شايف وراضي.
ـــــــــــــــــــــــ
جيش العرب في السّلاحليك
قاعد يستّف مدافع
لا عايز يمد السّلاح ليك
ولا حتّى سايبك تدافع.
ــــــــــــــــــــــــــــ
يا وطنّا ميتى راح تفوق
قطّعت توب العروبه
خليت جمالك بقت نوق
وسباعنا صبحت ركوبهّ
ـــــــــــــــــــــــــــ
يا مصر شدّي العزايم
لمّي الصّفوف وحّديها
كفيانا فرقه وهزايم
ما في حد غيرك حديها.
ــــــــــــــــــــــــــ
أنا عندي عِمّه وطربوش
من عصر جدّي ف زمانه
من جزمه واحده طار بوش
وجه أوباما مكانه.
ـــــــــــــــــــــــ
وفي الحديث عن مصر قال:
ما طلبش منّك ألوفات
ولا ورث طالب ف نيلك
لمّي العقارب والأفات
دا بعوكي ومبّهدلينك.
ـــــــــــــــــــــــ
وفي قناية الحكمة يقول:
النّدل إوعاك تماشيه
لو حتّى وقتك خِليلك
واجب عليك أن تحاشيه
ولا تاخدُه مرّه خَليلك.
ـــــــــــــــــــــــــ
النّدل واطي ما يعلاش
لو يملك الدنيا بإيده
يلوّش وكَنه ما لاش
ويجيك وعايزك تزيده.
ــــــــــــــــــــــــ
يا بنّا عندي تع ابني
أنا طوبي وسْمَنتي حاضر
لُوم القرابه تعبني
ما ف مرّه بيقولوا حاضر.
ــــــــــــــــــــــ
الحجل يا بت شخلن
صحّى شعوري الدّفينه
خليتي قلبي اللي شاخ لان
وبطوبه حتّى إحدفينا.
ــــــــــــــــــــــــ
أنا شُفت قُلّه مع زير
والزّير ما سادد مكانه
تيجي تقولّه معازير
وفيه زير سادد مكانه.
ـــــــــــــــــــــ
وحينما تكلّم عن الدنيا قال:
والله ظُلمك دبحني
صابر يا دنيا وعايش
من غُلبي ماشي وباحنّي
لجلٍ تُهون المعايش.
ــــــــــــــــــــ
وعن المرأة قال:
تاخد الأصيله تعلّيك
والعرض منها تصونه
أمّا الخسيسه تِعلْ..ليك
لو قصر هدّت حُصونه.
ــــــــــــــــــــ
أصل الأصيله ليها ناس
وكبير له رأي صايب
الغلطه بيطيّر فيها راس
يكفينا شر المصايب.
ــــــــــــــــــ
منقــــــول