جرح الحب
للشاعر الكبير
عادل صابر
أمير فن الواو
************
رابطة الضفاير بحردة
ام الرموش الكواحل
وعنيها كيف البحَر ده
والجفن يفنى مكاحل
***
سلاع رموشك لسعنى
دقدقنى تحت الخلايق...........(الهدوم أو الملابس )
والجفن بدلاله ساعنى
دبَّح ماخــــلا خلايق
****
ودبحنى رمشك وراقْدَام.............(ورا قدّام)
والجسم منى عطايب..............(عطب)
وصفولى حتى ورقدام .........(ورق دوم)
والجرح مكران ماطايب
***
انا قلت دا البعد اكرام...............( أكرم)
مالى ومال الشبايك...............( الوقايع)
واول ماضحكتلى اكرام
وقع القليب فى الشبايك...........(الشبك)
***
وعشقت ياما ووديت
وقليبى شايل قناطر.................(قناطير)
وايش خدت م العشق واديت
غير لطعتى ع القناطر!!
***
والعقل م الصد دربى...........(دار بى )
طلَّع فى جسمى ترايب......(جمع ترباية وهى اثار الوجع)
وصحنت بقدامى دربى
خليت حصاها ترايب
***
وألاقى فين للى جرى حل
سهران فى ليلى مانامشى
وألم شوقى واجى ارحل
القلب يحلف مانمشى .
***
وباسف صبرى ماربوش
م الحب عمره جا- راحة!!
خضرا جروحى ماربوش.......(لم يربوا صديدا بعد)
محتاج أشعة وجراحة
***
يا طبيب م الحب عيّان
ووحيِّد امى وحيلة
والجرح جوايا عيان........(عيّن)
قاللى ما باليد حيلة
***
انا قلت تداوينى إبكام
وطبيبى سامع ماناطق
ياك انت يا طبيبى ابكام!! ...... ( أبكم )
قال جرح ماله مناطق!!
***
دنَقَر وقال لى اباَّ ـ جينى .........( ابقى تجينى)
فى تمن علاجك ماشارط
حضر مشارطه وبجينى...............(وبجّنى)
قام جرحى بلع المشارط
***
قاللى علاجك دا ف اسيوط
فى الطب علما اكابر
والجرح يضرب كما سيوط............(سياط)
ماقدرت اعاند واكابر
***
ف اسيوط الجرح كشفوه
واحتاروا فيه الطبابا
رطنو بلغاهم وكشفوه.........(كشوا ـ فيه)
قالوا دا مغرم صبابا!!
***
عقدولى جلسة وكانسلت..........(كانسلتو)
والفكر واخد وجايب
قالوا دا لو تور كانسلت ...........(كان سِلى)
واللهِ شى م العجايب!!
***
قالوا دنيا والله دامتشى...........(مدامتشى)
خبطوا بكفوفهم وقلبوا
طب كيف لسة دا ـ ماتشى
والجرح نافد لقلبه!!
***
بلا زاد عايش وبلُا ما.....................(بلا ماء)
والحب سلسال عيايا
ياك الاطبة دى بُلما!!..................(مبلمين)
ماعرفوا مرة دوايا!!
***
مايعرف الراحة مقهور
ولا يرقد الليل جايع
ولا قال على الطب معذور
الا اللى عرف الوجايع!!
***
قالولى روح قصر عينى
طُببا وربك حداهم...............(رعاهم)
انا قلت صبرك يا عينى
يمكن دوايا حداهم
***
وطلعت فى الحال ع القصر
مجاريح حجزوا السراير
والعمر لا طول ولا قَصْر
والرب عالم السراير
***
انا قلت لوينفع الطُب
لادبح دبيحة ونادر..................(وندر)
قالولى مرضك هو الحب
مرضك ياعيان دا نادر!!
***
تعبت قدامى من اللف
رحت لطبيب انجليزى
قال يابنى مرضك هو ال love
and it isnt easy
****
قاللى مليكش دوا حداى
والحب هو طبيبك
Im sure my boy you "ll die
اذا لم يهاود حبيبك
****
من غلبى انا جبت رماّل
فاهم فى رمله وعلومه
ورميت بياضى وراح مال
فى جروحى تاهت نجومه
***
وقرالى بختى فى فنجان
نزلت دموعه مقادر.............(مقادير)
قال يابنى مرضك دا فنجان.....(فن جان)
واللهِ يابنى ما قادر
***
وحكيت حكايتى لدرويش
فى الحب واخد طريقة
وقرا فى وِرده ودارويش......(دار وش)
مالقيش لحبى طريقة
***
لا وزن فى الحب ولا قيس......(ولا قياس)
فى القلب شوقنا ماسايل
لاتقوللى ليلى ولا قيس
حكايتنا مالها مثايل