مدح في رسول الله صلى الله عليه وسلم ..
من ذاكرة الفن الشعبي .
في موسم الحج
****************
يا بير زمــــزم سَـــــلَبك سلاسل
والشُــــــــربة منك دوا للمسافر
يا بير زمـــــــزم سَلَبك حريرى
والشُـــــــــربه منك دوا للعليلي
******
يا بير زمزم سلبك حجارة
والشربة منك دوا للحيارى
*****
يا فاطمة يا فاطمة يا بنت التهامي
افتحي البوابة يا فاطمة ابوكي دعاني
يا فاطمة يا فاطمة يا بنت نبينا
افتحي البوابة يا فاطمة ابوكي داعيني
********
انا بامدح سيدنا وعلي ابن عمه
يوم القيامة النبي يطفي النار بكمه
وانا بامدح سيدنا النبي وعلى صديقه
يوم القيامة النبي يطفى النار بإيده
*****
راجل دعاه النبي ماصغيَّر يا ربي!!
شاله حرير يا ولدي ولفّه عربِّي
راجل دعاه النبي ماصغيّر يا سيدي!!
شاله حرير يا ولدي ولفُّه صعيدي
*****
لما نويت يا حاجج خد امك في طولك
تنظر جمال النبي وتسوِّي فطورك
لما نويت يا ولدي خد امك معاكم
أمك شديدة يا ولدي وتسوِّي غداكم
*****
وهان عليا بيتي ولبن الجاموسة
رايحة ازور النبي وفاطنة العروسة
وهان عليّا بيتي ولبن البقيرة
رايحة ازور النبي وفاطمة وليلة
*****
لما نويت يا حاجج خد السمن سايح
ينفعك يا حاجج في دبح الدبايج
لما نويت يا حاجج خد السمن ميّة
ينفعك يا حاجج في الروحة والجية
******
يا جزمة الحجاج ماتفصيل نصارى
اتقطّعت في الجبل ومشْي الحجارة
يا جزمة الحجاج ماتفصيل يهودي
اتقطّعت في الجبل ومشْي الجرودي
******
يا ريس البواخر مال البحر عالي ؟!
ماتخافوشي ياحجاج دا انا ريس قراري
يا ريس البواخر مال الموج مضلِّم ؟!
ماتخافوشي ياحجاج دا انا ريس معلِّم
******
يا ريس البواخر ماكنِّه صعيدي !!
لما اتاه العدَل قلَع بالرقيقي
يا ريس البواخر ماكنُّه بحيري !!
لما أتاه العدَل قلع بالصديري
*****
رايحة فين يا حاجة يا ام الشال قطيفة
رايحة ازور النبي يا ولدي والكعبة الشريفة
رايحة فين يا حاجة يا ام الشال لموني
رايحة ازور النبي يا ولدي وامتِّع عيوني
رايحة فين يا حاجة يا ام شال سماوي
رايحه ازور النبي يا ولدي وارجع ع القناوي
******
في طريق النبي بنيّة تغنِّي
ماليه السبيل من زمزم للعاشق يصلي
في طريق النبي بنيّة بطاسة
مالية البريق من زمزم سبيل يا عطاشى!!
*****
في طريق النبي بنيّة بتوب احمر
ماليه السبيل من زمزم يا عطشان تعا اشرب
في طريق النبي جنينة بورقها
تقعد فيها الحجاج وتنشّف عرقها
*****
في طريق النبي يمينك شمالك
عند حرم النبي يا حاجج ونخِّي جمالك
في طريق النبي شمالك يمينك
عند حرم النبي يا حاجج وريِّح هجينك
******
نخلتين في الحرم يا محلا هواهم
هنياله الحاجج والله اللي قيَّل حداهم
نخلتين في الحرم يا محلا بلحهم
هنياله الحاجج والله اللي بعينه لمحهم
*******
يا بابور السفر يا أحمر يا دومي
سمعت مدح النبي محمد صحاني من نومي
يا بابور السفر يا أصفر يا عدسي
سمعت مدح النبي محمد صحّاني من نعَسي
******
يا حمام الحما يا بوجناح رقيقي
رشيت له السمسم على باب حبيبي
يا حمام الحما يا بوجناح مزوَّق
رشيت له السمسم على باب محمد
*****
فاطمة تقول لابوها ما زحمة المدينة!!
قال اسكتي يا فاطمة محبوبنا ياجينا
سيدنا الحبيب النبي قالوله بناته
قالوا أنت حر يابا واللي تحبه هاته
*****
نفسي ازور النبي ولاشى بيدي
ويا قادر يا كريم عدّلها يا ربي
نفسي ازور النبي ولاشى بإيدي
ويا قادر يا كريم عدّلها يا سيدى
*****
مال البخيل يا ربى يغور في جريمة
ولا غسل رمِّته ولا زار نبينا !!
مال البخيل يا ربى يغور في جهنم
ولا غسل رمِتُه ولا زار محمد !!
*****
عزّمتني ليلى لحد المخاضة
عاودي يا ليلى لقيتلي رفاقه
عزّمتني ليلى لحد التريّا ...(الثريّا)
وعاودي يا ليلى جميلك عليا
****
عزمتني ليلى ودقِّت في كمي
عاودي يا ليلى مروِّح لأمي
عزمتني ليلى ودقِّت في شاشي
عاودي يا ليلى مروِّح لناسي
*****
وان عطاني ربي لاسوِّي واسوِّي
وأقيد شمعتين على الباب تضوِّي
وان عطاني ربى لاسوي العجايب
وأقيد شمعتين وأدعي الحبايب .
ــــــــــــــــــــــــــــــــــــــــــــــــ