يا حاضرين لله
صلوا على رسول الله
نحظى الرضا من الله
لما نسمع سيرة الخضر
مع موسى كليم الله
قصة جميلة جميله
تشفي الروح العليله
قصة جميلة ما أحلاها
ما أجملها في معناها
إن كنت مكذب إلقاها
هات المصحف واقراها
في سورة الكهف تلقاها
نزلت في كتاب الله
سورة الكهف جميله يا عين
نزلت على نبينا الزين
أولها يحكي أهل الكهف
وبعد كدا حكاية الرجلين
إن كنت أمشي في سورة الكهف
أروح لإسكندر ذي القرنين
وإن كنت أختم آخر السوره
يأجوج ومأجوج ساكنين فين
لكن خلينا مع الخضر وموسى في مجمع البحرين
بسورة الكهف زايد تشريفي
أما الزجل من تأليفي
أصرف كلامي بتصريفي
أرويه لأهل التعريف
نظره يا أهل التشريف
يا آل بيت رسول الله
الكليم ابن عمران
الكليم حبيب الرحمن
مره طالع في الوديان
في الطور بيناجي الديان
بيقول يا رب أيا علام
فيه رسل زيي أم لا
يا موسى ربك بيحييك
من طور سينا بيناجيك
رسل زيك وأعلم منيك
والباطن سيبه لله
خر صعقا من الخجل
يوم أن دك له الجبل
ربه قال له كل شيء خلقته بقدر
روح قدامك تلقى الخضر
أول حاجه يوصيك ع الصبر
وكن صابر أيا موسى معاه
قال نفسي أشوفه قبل ما أموت
يا موسى في طريقك عدي وفوت
إن كنت مسافر خد الحوت
مطرح ما تنسى الحوت تلقاه
حلوه يا ساده صلاة الزين
لما تقابلوا الاتنين
في مجمع البحرين
ظاهر وباطن حلوين
نال الرضا وعمه
سيدنا الخضر بقي عمه
لقيه بعلمه اللدني
قال له من أخبرك عني
قال له ربي اللي خلقني
بالله يا شيخي أيا عمي هل أتبعك لتعلمني
قال له إن كنت عايز تتبعني
وفعلت شي لا تسألني
وكن صابر والصبر أولى
الصبر يا ابني دوا لينا
لما طلعوا برا المدينه
الاتنين النيه عقدوها
على رحلتهم يمشوها
وعيوا لسفينه وراحوها
الاتنين يا ساده ركبوها
وفي نصف البحر وخرقوها
قال هي دي شغلة مجانين
قال له دا أمر من العليم
لو تصبر كل شيء حيبين
أصل السفينه للمساكين
وجو الملوك راح ياخدوها
طلع الخضر من واديه
وفيه غلام ماشي جنبيه
على عنقه وفضل يديه
قال له الكليم أنا أفديه
قال له إنت يا ابني مالك بيه
دا ع الكفر حيموت والديه
أوعى تمشي يا موسى في ضله
ماحناش يا ولدي فاضيين له
لو قلت لك على اللي حصل
أمه وأبوه كانوا حيضلوا
دخلوا مدينه يا سلام
لا فيها ميه ولا طعام
أهلها كانوا ناس بخلاء
أبوا أن يضيفوا الكرام
الخضر ناصح مين جده
بنى الجدار بعد ما هده
قال له خد أجره على قده
تساوي تعبه مع كده
فمسك الكليم هنا من يده
وقال له الفراق بينك أولى
راجل على وجهه النور واضح
وفي طاعة مولاه فالح
الكنز دا لراجل صالح
ووراه كان مخلف أيتام
حلوه يا ساده صلاة الزين
لما افترقوا الاتنين
من مجمع البحرين
زجل الشيخ أحمد برين
وسلامتكم