دنيا ولا تسوى قنديل
ولا تسوى إنك تطاطي
ما يقندل العيشه قنديل
غير فعل أبو أصل واطي
تعبنا والنفس طمت
ضاقت علينا الخلايق
غرقنا في بحر طمت
من أفعال الخلايق
يا قلبي مالك موجوع
والدنيا فرح غناوي
يا قلبي ياما نزلت دموع
اقصد ضريح القناوي
سنتين في هم وأفكار
سنتين في غلب الليالي
سنتين في سهج مع نار
سنتين يلومني الخوالي
على بعض دول تمن سنين
معاي جرح ربى الحبايب
فضلت في جضيض وأنين
مسكين وعادم الحبايب
ولا حد خالي من الهم
حتى قلوع المراكب
أوعى تقول للندل يا عم
لو كان ع القلعه راكب
مين في همي بكى معاي
إن بكيت أوعو تلوموني
حبايبي اللي كانوا معاي
لما عييت حبايبي فاتوني
يا قلبي لاكويك بالنار
بيمين لازم أسيبك
يا قلبي حملتني العار
عامل عدوك حبيبك
مين اتغلب كيف غلبي
جرحي في جوفي هراني
جابولي المحاوير صلبي
تقدم خصيمي وكواني
في زمانا كتر الكلام
يا كلام قولي إنت مالك
اللي يلوم ع المبلي يتلام
يا شيخ خليك في حالك
في الزمان ياما شفنا الويل
شفنا العجب والعجايب
وأنا ضربتي جات بالليل
آهين يا غلب القرايب
في زماني ياما شفت وقاسيت
لما راح عزي وخيري
فيه اللي ماطلعشي م البيت
ويقول مافيش غيري
كل جرح وليه طبيب
وأنا لجرحي مالاقي
قالو دواك عند الحبيب
دورت عليه ما لاقي
بعد أبويا قولي السند مين
لا تقول عمي وخالي
مفيش غير رب العالمين
هو اللي عالم بحالي