إنتي مش طالق
شعر محمد الريفى
انتي مش طالق
جات الحزينة تحزن..
حلف يمين الدمع ماينزل
لما الخدود شقت..
وشدت رحال التوهة..
ف المشاوير..
يابير مسعود السعد فين
سبع طوبات ف المعطوبة..
ومفيش توبة
علي روس السكك مكتوبة..
قلة البخت...
ومن تحت لتحت..
شيطان البت اياها..
بيوزك ع الكحت..
ف سراديب قلبك..
بيشنش لها طاقة جواك..
وهناك...
البت اللي زمان..
عوجت رقبتها..
لجل توصلك..
جوعها الكافر..
لحاجات...
انت نفسك..
صايم عنها..
ومش بالخاطر..
مديها قفاك..
بتعافر...
لجل ترميها..
ف قلب الحلم المرتجع..
وتعلي صوت الوجع..
ف القصيدة..
بعيدة... بكل الشعور..
بتدور تصعبك..
علي كل البنات
صعبت عليها نفسها...
ساقت عليك الهم..
قالت: حبها ذنب..
قالت محدث قلب...
قالت وقالت...
ولانها اغلب م الغلب..
للآن..مابتعرفش..
تثبت جواك...
غير عشقك للسفر..
ف سكة مافيهاش عنيها..
اللي انت بتمووووت فيها..
فكراك مش فاهم...
يعني ايه...
الشمس تنزل م السما...
تحمي الفرن..
وتوبها يطفي..
ويختفي معاه الحلم..
بشئ تستاهله...
بتتجاهله كل الناس..
بتصادر جواك احساس..
بوجعها... خوفها... كسوفها...
لو حد شافها...
شايلة فوق راسها...
شوال غبارة...
يتقوت بيه الطير..
لجل يجود آخر النهار...
بحاجة تسد جوع الدلالة..
وتغني من مشوار...
اخرته عتمة...
وحيااااااة الختمة
بحبك
لساكي
علي ذمة قلبي.
اللي من تحت كوام الضلمة..
بيضوي..
بيغني من جواه يوماتي..
موال الصبر الصابح..
علي ريق الامل ف الحياة..
ياااااه..
كفايانا قول ف بعض..
وتعالي نقول لبعض..
.ف نظرة رضا..حرفين...
حافين قلوبنا الحفيانة..
شوق.. ونروق
وحياةالحب بقولهالك..
قدام الخلق والخالق...
انتي مش طالق..
انتي مش طالق
انتي مش طالق