( ماتخافوش)
مهداة الى اطفال سوريا .
**************************
للشاعر عادل صابر
لو فى يوم الظلم غيّم ع الحقيقة
ماتخافوش
لو تمادَى الغدر لقلوبكو البريئة
ماتحزنوش
رغم طلقـــات البـــارود
رغم هجمــات القـــرود
رغم ليل مالهوش حدود
النهـــــار لازم يعــــــود
****
ماتقولـــوش ان الكــــلاب
يــوم حتقضى ع الأســوُد
مهما كان فى الكون ضباب
مش حتـــــدبل الـــــورود
مستحيل زعْق الغراب
يخنق الصوت فى الرباب
ماتخافوش بكرة سماكم
تبقى خالية م السحاب
بكرة فجر الحق يرجع
يفرش الدار والغيطان
بكرة شمس العدل تطلع
تنشر النور والأمان
بكرة كل الناس حتسمع
فى حلب صوت الأدان .