فن الواو والمربعات
مربعات من فن الواو
صلاة النبي تمنع ابليس
منها الفايده والتجاره
ياما ناس حازتها بالكيس
ماتت ما نالت الزياره
............................
حلو يا نبي وحلو مدحك
أنا شابكني غرامك
طول العمر انا سرت مادحك
حزين الـ مشافش مقامك
...............................
مغرم بحب النبي الزين
مدحته العضم بطل صلايه
النبي قال يا بلال أذن
يا بوبكر قيم الصلاية
.................................
همك يا دنيا شغلني
كمديون يسد المطالب
ناس حزينة وناس تغني
ومغلوب يضحك لغالب
....................................
يا دنيا كام زاد عجبكي
عشنا وشفنا العجايب
خليتي الأصيل بيبكي
مسكين عدم الحبايب
.....................................
ورا الأيام قلبنا وعدلنا
والدموع ع الخد ساحت
لما قربنا ناخد عدلنا
لقينا الايام ولت وراحت
.............................................
ليه يا زماني تاكلني
بعت العمامة والخليقة
أروح للوحوشة تاكلني
ولا لطعتي ع الخليقة
..................................
تاريها الدراهم بتنفع
تجيب بل ويا غنيمة
الصاحب اللي ما ينفع
البعد عنه غنيمة
....................................
غلب اليوم زاد على العام
أقلب حمولي ومراضي
تقل سمعي وصابني العام
وكله وخصمي مراضي
.................................
لو عطاني زماني بعدين
كنت أكيد للي كادولي
وخايف من الدهر بعدين
ليفرح ويشمت عذولي
..................................
يا طبيبي ليا متلحق
وهات الدوا الموافق
ياما ناس بتعرف الحق
ولجل الضرورة توافق
.....................................
الصاحب الزين يتحط فـ الجيب
وتفوح منه الروايح
الندل لما يبدي بالعيب
ماتيجي منه غير الفضايح
................................................
ابن الردية مالك بيه
ماشي متكبر وهايم
عطاله زمانه وملك بيه
قال ع الأسودة بهايم
...............................................
زمان انتهت عدليه
والبطل ع الحق راكب
جا السبع يطلب عدل ليه
لقي الهلف ع السرج راكب
...............................................
يا طبيب قرب تعا حداي
النوم حرم عيوني
أنا إن مت وسكنت لحداي
ولا أنساش كلمة عذولي
................................................
دنيا علينا تربت
انظر بعينك راعيها
شوف العنز لما تربت
ما نطحت إلا راعيها
.............................................................
شرق بلدنا بلد سيح
والهلف ماشي ورانا
مش عيب كراسي التماسيح
تقعد عليها الورانا
....................................................
يا اللي انت جايلي معاتبني
لي بعتني بالخساره
وحرقت قمحي مع تبني
دا جبن ولا جسارة
........................................................