• كريم حي خلق النهرده
والعصر من بعد موسى
من آدم لحد انهرده
مين كلمه غير موسى
• متنساش حبيبه محمد
صاحب الرتب العليه
من القدس عرج محمد
وخاطب لذاته العليه
• نبي جرح القلب شوقي ليه
مشتاق لأحمد مدينه
مايوقفش ع الباب شقي ليه
ولا يشوف نور المدينة
ــــــــــــــــــــــــــ
• كريم حي خلق النهرده - خلق النهر ده
والعصر من بعد موسى – من بعده مسا
من آدم لحد انهرده
مين كلمه غير موسى
• متنساش حبيبه محمد
صاحب الرتب العليه
من القدس عرج محمد
وخاطب لذاته العليه
• نبي جرح القلب شوقي ليه
مشتاق لأحمد مدينه
مايوقفش ع الباب شقي ليه
ولا يشوف نور المدينة
ــــــــــــــــ
سبب شيبتي حيرتني
ونزلت دموعي قرايب
من غيرها حيرتني
أهل عزوتي والقرايب
سبب شيبتي حيرتني – حية رأتني
ونزلت دموعي قرايب - قرب
من غيرها حيرتني
أهل عزوتي والقرايب
ــــــــــــــــ
لفات يا زمن لفات
ولا يوم تنظر لحالي
سكتت أسوده وآفات
واليوم تنفر سحالي
ـــــــــــــــــــ
سكت الهوا والناموس طار
والسبع طاطا بعينه
وقال عديها أستار
لما الندل ياخد يومينه
ـــــــــــــــــــــــــــــــــــ
شرق بلدنا بلد سيح
والندل ماشي ورانا
مش عيب كراسي التماسيح
تقعد عليها الورانا
ــــــــــــــــــــ
دنيا علينا تربت
انظر بعينك راعيها
والعنز لما تربت
ما نطحت إلا راعيها
ــــــــــــــــــــــــ
ليه يا طبابه صنطوا
ياك الجرح مس الستاير
زي ما كشفتوا غطوا
وهاتوا العواقب ستاير
ـــــــــــــــــــــــــــــــــ
زمنا زمن التقاليب
أقلب ما لاقي بصاره
العنز تجري ورا الديب
والسبع كلته الحماره
ـــــــــــــــ
علمتها نط السراديب
يا اسمر يا معجباني
أرينا العنز تجري ورا الديب
شفت العجب في زماني
ـــــــــــــــــــــــــــــ
بدل الأرايل بقي دش
ومنه تشوف العجايب
الفقري ليه راديو بيدش
حتى إذاعه ما جايب
ــــــــــــــــــــــــــ
سننطة بلدنا عابوها
ولا حد نقى قرضها
فيه خلق بتبيع أبوها
لجل ما توصل غرضها
ـــــــــــــــــــــــــ
دنيا ماتسواش قنديل
ولا تسوى إنك تطاطي
اللي يقندل العيشه قنديل
مشيك مع ابو أصل واطي
ـــــــــــــــــــــ
من همي اتلوى الزان
لمن عملته سريري
لو يوزن القول وزان
قمحك ما يسوى شعيري
ــــــــــــــــــــــــــ
صاحبي إل داينته كذا دين
لما دايني اشتكاني
وعمل لي في السوق مزادين
وعملني قصه وحكاني
موضوع: واوات ومربعات فن الواو 
الثلاثاء يناير 07, 2020 1:46 pm