أول كلامي حصلي
ع اللي الغزاله مشت له
واحكيله ع اللي حصلي
وازرع همومي ف مشاتله
********
صلوا معايا على البدر
طه النبي المكمل
هزم الصناديد في بدر
وصبر لغاية ماكمل
********
زينة الكلام مدح طه
والمدح زينة البدايه
فرش القواله وغطاها
سيرة رسول الهدايه
********
ابن الرديه مالك بيه
ماشي متكبر وهايم
عطا له زمانه وملك بيه
قال ع الأسوده بهايم
********
دنيا علينا تربت
انظر بعينك راعيها
العنز لما تربت
ما نطحت إلا راعيها
********
الدنيا زي المدارس
لو إنت بقلبك ناظرها
تخسف لفاهم ودارس
وغبيها يصبح ناظرها
********
الدنيا تعليم وخبره
والبيت يشبه لناسه
والله لأعزق بإبره
ولا ندل يبخل بفاسه
********
زمنا زمن الكلبات
لمض الصفيح بطلوها
طلعت عيال بلا أبات
تحلف براس أبوها
********
شرق بلدنا بلد سيح
والندل ماشي ورانا
مش عيب كراسي التماسيح
تقعد عليها الورانا
********
الندل زاين وعجبان
وع اليد ماسك له شيشه
بياكل فينو مع جبان
نسي يوم أكل الدشيشه
موضوع: من فن الواو waw 
السبت ديسمبر 21, 2019 8:58 am