| | مربعات وواوات للشاعر الكبير عادل صابر إبداع جنوبي من فن الواو والمربعات |  |
|
|
| كاتب الموضوع | رسالة |
|---|
شاعر جنوبي
عدد المساهمات : 193
تاريخ التسجيل : 24/01/2012
|  موضوع: مربعات وواوات للشاعر الكبير عادل صابر إبداع جنوبي من فن الواو والمربعات  الأربعاء يناير 09, 2013 12:51 pm | |
| يا مشتـرى الصـبر سِــفُّه سَــفْ ماتــرُبــُّوش
وافـــهم كـلام وِلْـــد صابر زين وماتــرَبــُّوش
إزرع غيــط الـــوِد للى يسـِـــد فى الغـيـبـة
واصبر على العيبة لو جات م اللى ماتربُّوش
......................................................
ياللى بنيت فى الوَطـا خلِّى الحيطان دايــر
فى الفجر كلب الـــردى بين البيــوت دايــر
يفسد عليــك اللبـــن وينجِّــس المواجيـــر
ويــدوس عليك الهَتيـــر أصلُه حَـجَر دايــــر
....................................................
رمّــالة تضـرب ودَع وتطمِّن الخــايفين
تُبرم نجوع البــلد تنـده على التايهين
رميت بياضى وشافت بختى وقالتلى
قلبك كنخل الطريق بيشبِّع الفايتين!!
...............................................
م الخوف يموت الجبان لو حد قال له بـِخ
و النفس زى الطفل تمنعها بقــولة كِــخ
بز الجاموسة طرى تقسَى عليه ينشف
وعالى ضهر الجمل طبطِـب عليه حينِّخ !!
....................................................
دنيـايــا وحَـــلَة وربـابــة.......(ربوبة وطين)
وجبيـنى كالنخــل عـالى
من قـــولى بكت الربـابـة
بس الــزمـان ماوعـــالى
........................................
وغزلت قـولى بـنــــولى
فـــصّلْت للـناس خـلايق
والشُعـــرا قُبّـة بـنــولى
واجب تزورها الخـــلايق!!
.................................................
بالمُـر تـفتـفت مهــرك
ونكرتى تعبى وخيـرى
طب ليه بتدينى ضهرك
وتولِّى وشـــك لغيرى !!
.................................
وقفلتى بابـــك بتـرباس
ع الحصــوْ ذُلِــك رامينى
كام ندل فى الخد تار باس
طب ليــه وانا تحرمينى !!
...........................................
إعدل كلامك ياخى وليق
دا الخلق سمعـة وسيرة
كلمة تغـفلقها غِفليــــق
والـنار تقيدهـا سفيـــرة...........(عود قمح) | |
|
| | |
شاعر جنوبي
عدد المساهمات : 193
تاريخ التسجيل : 24/01/2012
| | موضوع: رد: مربعات وواوات للشاعر الكبير عادل صابر إبداع جنوبي من فن الواو والمربعات الأربعاء يناير 09, 2013 12:53 pm | |
| وعملت فيـكى رفـاعى
وقليبى بالمُـر حــــاوى
فى الدنيا كتروا الافاعى
بيِّن شطارتك ياحاوى !!
..................................
ياعبـد واجـــب تلِـــف الـــدنيا وتــراهــا
تشبه ربــاب الحَـلَـب بــيـنـوُح وتــــراها
والخلق تايهـة مابين ظالم وبين مظلـوم
ونـسيــوا نوم اللحـود والأرض وتـراهـــا
..............................................
يالابس الدنيـــا عــريــان!!
حتعيش حياتك فى توهة
غـرِّت مـوالى وأعيــــــان
راحـوا فى غفـلة وفاتوها
.....................................
خنتى اللى لمِّـك وضمِّك
ونسيتى كل اللى حاصل
طبــع الخيــانة فى دمِّـك
لو يحبسوكى فى حاصل !!
.................................
| |
|
| | |
شاعر جنوبي
عدد المساهمات : 193
تاريخ التسجيل : 24/01/2012
| | موضوع: رد: مربعات وواوات للشاعر الكبير عادل صابر إبداع جنوبي من فن الواو والمربعات الأربعاء يناير 09, 2013 12:53 pm | |
| غنوة لمصر
*********
يابلـــدنا قـــولى قــــولى
غنى لعيـــــون الصبــــاح
رجعى فرْحـــى وطبــولى
رجعى الحــــلم اللى راح
نفسى افرد فيكى طولى
واجرى والعب فى البـــراح
***
عايقة يامة ف وسط جيلك
عشق ساكن فى القلوب
كـــل ماباسمـــع صهيــلك
بارتمى فى حضنك وادوب
لو فى آخر الكون حااجيلك
والحــــقك قبـــل الغــــروب
فااسمحيلى اكـون دليلك
لو تتـــوه بيكى الــــدروب
***
قومى ياامة من ترابـــــك
واغســـلى وش الزمــــان
ياللى عشتى سنين شبابك
حضـــن دافــــى بالأمـــان
ياامة وكفاية اللى صابـــك
واللى نابك م الغيــــــلان
قومى ياامة وزقى بابـــك
وانجدينــــا م الطوفـــــان
***
نفسى يامــــة ترجّعينى
طفل عاشق للخَضـــــــار
من صبــــاكى ترضعينـــى
ضحكــــة من خــــد النهار
بس اه لــــو تسمعيــــنى
ياللى غايبة عن الديـــــار
كنت اشيلك جـــوا عينى
وابتــــدى بيــــكى العمــار | |
|
| | |
شاعر جنوبي
عدد المساهمات : 193
تاريخ التسجيل : 24/01/2012
| | موضوع: رد: مربعات وواوات للشاعر الكبير عادل صابر إبداع جنوبي من فن الواو والمربعات الأربعاء يناير 09, 2013 12:55 pm | |
| مــرِّت عليـنا كـذا عــام
تايه عددهم فى راسى
غرقان قاربنا مايوم عـام
يامــا بعيـدة المراسى!!!
...............................
امشى مع الدرب لـــو دار
واوعاك تلـوف ع الـمداخل
وابعـد خطاويــك عـن دار
لـو تلمـح الهـلــف داخـل
..................................
طول مااشتريتــــوا العتمة بنـــهار الوطن
وجعلتوا تـــوب الذل بيـــــــــدارى الكفن
طول مادفنتوا الشمس فى قبـور الضلام
بكرة تفيح على دربــكم ريحــة العفَـــن
...................................................
البير نشف والمزاير كــرهت الميـة
والفخ منصوب فى حنكُه ألْف قِمريّة
رضعوا عيال نجعنا بز الوجع ع الريق
والحلم فوق الطريق مقتول بلا ديّة
..............................................
| |
|
| | |
شاعر جنوبي
عدد المساهمات : 193
تاريخ التسجيل : 24/01/2012
| | موضوع: رد: مربعات وواوات للشاعر الكبير عادل صابر إبداع جنوبي من فن الواو والمربعات الأربعاء يناير 09, 2013 1:00 pm | |
| الخــــلق لاطـمـاع كَلِـتهــــا
صارت شيّمْهم نـــقايــــــص
والدنيـــــا غــرَفت كــيلتـهــا
بالبــُطْـــل عـبَّــت نــقــايـص
..............................................
فى الجرن تحت القمر يامـا لعبنا الطـــاب
والشاى فى دمس الكانون بيجمِّع الأحباب
نلعب ونشـرب ونسمع ضحـــكة النــــورج
والدنيا متبسّمة والعمر لسّة شـــــــبـاب
(من قصيدة فى حب مصر)
..................................................
عاشق هوا العصر لما يرقِّـص الصفصاف
ويوشوش النخـل ويغنى مع الكرنــــاف
واحب فيكى أنين الساقيـــة لما تنــوح
تروى غيطان العنب ماتخلِّى حتة نشاف
(من قصيدة فى حب مصر)
...........................................
ندّابــة خرسا وليــل اسود وشعب ضرير
فارطين قلوع الخلاص راضيين بأى مصير
ضـــاقت علينا السكك رغم اتساع الكون
تايهين مابيــن اليــأس والحــلم الفقيــر !!
...............................................
يا كل قلب ضعيـــــف بيسعى للبـــــقا
احنا الحــــــصاد المر من نبْت الشقـــا
حالفين نعيش ونموت على صدر الوطن
موت الكرامة لــو بحـــــــبل المشنقــة | |
|
| | |
شاعر جنوبي
عدد المساهمات : 193
تاريخ التسجيل : 24/01/2012
| | موضوع: رد: مربعات وواوات للشاعر الكبير عادل صابر إبداع جنوبي من فن الواو والمربعات الأربعاء يناير 09, 2013 1:04 pm | |
| يا مثبتين القيـــد فى معــصم كل إيــد
احنـــا ولاد الشمــس ماحناش العبيـد
مانبعش فجــرنا لو حتــدفعوا ألْف ليـل
وحنشترى الصبح العفى بمليون شهيد
.................................................
الصبح جــاى فارد جناحــــه ع البيوت
سيبوا شعاع الشمس يدخل للتابوت
ملعونة كلمة حق تغرق فى السكوت
إحيـوا الضمير جــوّاكو لو حـاول يموت
.................................................
اسمع نصيحتى أيـــها الشعـب الأبى
عمره ماينبت فجـر م الليــــــل الغبى
واوعى تغرّك ومضـــــــة النـــور البليد
دى شرارة شاردة من صاروخ الأجنبى
..............................................
أحلف بصوت المكن والشرشرة والفـاس
والنيل وغيــط القصب وام الهنا وعبــاس
حتعيشى يا مصر طول الدهر مستــــورة
وحتبقى كلمــة ولادك للزمــن نبــراس
......................................................
ياللى افتكرتـوا الدبابات ابراج حمـــــــــام
ماتعشموش فى الدم يطـرح يــوم سلام
لو تطفوا نور الحـق حتعيشوا ف ضـــــلام
وان يـوم زرعتوا المـــــر رح تجـــنوا الآلام
.................................................
رغم انكسار الحلم فى جبين النـهار
لسة فى عيون الصــبح غنوة للصغار
وبرغم صرْخ الجـــوع وكرباج العطش
رافضــين ندوق اللقمة من يـد التتار
.................................................
صار يا خسايس حلمكم وهـم وسراب
صوت الحدادى ماخنق نغم الربــــــاب
فاكرين شبَككم خَـبَّل النسر العنيـــــد
أتاريه خدعكوا النسر واصطدتوا الغراب
| |
|
| | |
شاعر جنوبي
عدد المساهمات : 193
تاريخ التسجيل : 24/01/2012
| | موضوع: رد: مربعات وواوات للشاعر الكبير عادل صابر إبداع جنوبي من فن الواو والمربعات الأربعاء يناير 09, 2013 1:07 pm | |
| عاشقِك رحاية ومدرايـــة وبرج حــــــمام
ويتيمة وسْط الغيطان تشقى على أيتـام
توبها اللمونى اشتكى لما الزمان خانــــُه
والصبر على وشها راسم شقا الأيــــــام
...........................................
ياللى هجرتوا الوطن وسرقتوا ملايــينُه
من بعد عشق الوطن دلوقتى كارهيـنُه!!
مصّيتوا دم الفقير ولحستوا أحلامـــــــه
آن الاوان للـوطن يطــرد تــــعابـــيــــنُه
.................................................
لو عشتوا حيمــوت الوطن وان متّوا عـاش
وان بعــتوا حيروح الشرف وان راح ماجـاش
ياللى قبضتوا من العدو تمــــن السكـــوت
بكرة العــدو ... نـفس العدو يبيعكم بـلاش!!
..................................................
وبـــرغم زمـن البُــكا لســـــة باغنيـلِك
واقعد على الشط واتمــدَّد وابوس نيلك
وف ساعة الكـــرْب تلاقينى انا الصامــد
وف ساعة الحرب فارس فوق ضهور خيلك
...............................
النــــدل فايــت وفـــارط ع الكتـــاف عـيــبــــة..... عباية
بالـــغــل منفــوخ ومـالى بالشــرور عـــيـــبــه.....عِــبُّه
مافلــتــْش يــوم من لسـانـه طفـل ولا شــايب
واهـــل المعــايب يموتـوا وتفضــــل العــيـــبــة
.....................................................
| |
|
| | |
أبو علي
عدد المساهمات : 384
تاريخ التسجيل : 21/12/2011
| | موضوع: رد: مربعات وواوات للشاعر الكبير عادل صابر إبداع جنوبي من فن الواو والمربعات الخميس يناير 10, 2013 5:21 pm | |
|
الله عليك
مشكور يا شاعر
واوات جميلة
فكرتنا بأيام زمان
| |
|
| | |
شاعر جنوبي
عدد المساهمات : 193
تاريخ التسجيل : 24/01/2012
| | موضوع: رد: مربعات وواوات للشاعر الكبير عادل صابر إبداع جنوبي من فن الواو والمربعات الجمعة يناير 11, 2013 1:59 pm | |
| فى الفجــر والدنيـــا طيّاب
سرحوا الكلاب فى الطراوة
أوصِيك ماتفتح فى يوم باب
أصـــل الفطاســة ضــراوة ....( تعوُّد )
...............................................
من غَش يا صاحبى يتغَش
ولا يدرى مين اللى غشُّه
الــسم لحمـــامُه يتـرش
لو حتى كارِك فى عِـشُّه
......................................
| |
|
| | |
شاعر جنوبي
عدد المساهمات : 193
تاريخ التسجيل : 24/01/2012
| | موضوع: رد: مربعات وواوات للشاعر الكبير عادل صابر إبداع جنوبي من فن الواو والمربعات السبت يناير 12, 2013 8:21 pm | |
|
كُحيلة بدلال لابسة شـــال خلفيـها..(خال فيها ولاق عليها )
ليها وجه زى القمر والشفَّة خلفيـها..(خال على شفتها وحسنة)
من يوم رأيتها حِرِم نومى وليلى طال
تُخْـطر بخلخــال وكل النجع خلفيـها ...(خلفها اى وراءها )
.................................................
الــدهـــر يـا حُــر بكّـــــاك
حتى لجمايلك ماحافــض
فاضى مــن القرش بُــكّاك
والهـلف شايـل محافــض!!
......................................
فى الفجــر والدنيـــا طيّاب
سرحوا الكلاب فى الطراوة
أوصِيك ماتفتح فى يوم باب
أصـــل الفطاســة ضــراوة ....( تعوُّد )
...............................................
| |
|
| | |
محمود توفيق
عدد المساهمات : 110
تاريخ التسجيل : 24/01/2012
| | موضوع: رد: مربعات وواوات للشاعر الكبير عادل صابر إبداع جنوبي من فن الواو والمربعات الأحد يناير 13, 2013 4:29 pm | |
| مشكور
على هذه الابداعات
تقبل منا خالص التحية | |
|
| | |
| | مربعات وواوات للشاعر الكبير عادل صابر إبداع جنوبي من فن الواو والمربعات | |
|
