مع شعراء الواو والمربعات

عدد المساهمات : 193 تاريخ التسجيل : 24/01/2012

زمنى رمـــانى وجـات الرمية ع الخـالى

على العويـل اللى كنت أقول له ياخالى

الله يجازى الظروف حـوجـتنى للعـــايب

والقلب خايب وكَـب السمــن ع الخالى.............( الخَل)

...........................................

سلاّع رموشك لـسعنى

دقدقنى تحـت الخـلايق

والرمش بدلالُـه ساعنى

دبَّـح ماخـلاَّ خـــلايــــق

.......................................

حبــــل الــوداد اتـقــطع صـــار البعـاد بُعــدين

وانـده اقـــول ياولَـد.. يـفـنــس يقــول بعــدين

شـوف تاجـر الــوِد عمــــرُه مااتكـــرَى ولابـاع

دلـوقتى بارت بضاعتـــه وللخـسيس باع دين

...................................................

ع الخد متـربِّع الخـــال

والفكر منى جــا-رايـح

اوعى تلوِّم ياابو الخــال

فى العشق ياما جرايح

.........................................

نار الخشب تشعل وأطفيها

نار الضنا كيف العمل فيهـــا

نار الخشب تشعل من الكُوّة

نار الضنا فى القلب من جوّه

.............................................

أُمى وابويــا شموس فى الضلمة أراضيـهم...........( أرى ضيّهم)

قلبى كعــود الوفـــا مزروع فى أراضيــــهم

هُـمّا الفِــراش والغطا ..هُمّـا الدفـــا والنـور

لو حتى سكنـــوا القبـــور واجــب أراضيهم

.........................................................

يامــــا خـــلايق غواهــــا ابليــس وذنوبهــــا..........( زَن بيها)

كيــف العقـــارب وشايلـة السم فى ذنوبهـــا..........( أذنابها)

بكـــرة يجيك يــوم ماتعتــَـر فيـــه على أهلك

والخـــلق تهــلك وتـبـــقى اوزارهـا وذنوبهـــا

...............................................................

يابهيـــه منّك أنــا وســمـــاري من طينــــــك

ولا طُلْت حتى البصـــل والهِــــلف كَــل تينــك

أنا اللي من قوت عيالي اشتريتـــلك شــــــال

أدهم أنا في المحـــــبة وف الهـوى ياسينــك

................................................................

مراكـــب الــود عـــدّوا النـاس ماعدّونى

ع البَـــر واقف بقــالى سنين ماعــدّونى

دنيــــا رديــــّة ماخـلَّـت للحبـــايب وصْل

من قِــلـّّة الأصــل بـتـصفِّى مع الــدّونى

............................................................
كنـــا فى زمان الصبـــا لينا غُنـــا معقــول...........(مع قول)

وكنـــا فى الجلســة نتكلم كـلام معقــول

وانا كنـت كيف الحمام عاشق وكلى أمــل

دلوقتى زى الجمـل واقــف لكـن معقـــول!!.............( مقيَّد بالحبال)

..................................................................

بــت اليوميـن دول ماعارف ضهــرها مناويش ( من وش )

ساعة بتلبس عِبي وساعة بقميص مناويش

فعْـــل البـنــتَّــة صبح حـاجــة تغيـــظ الحُـر

وحتشرب المُــر ياللى ع الحـــلال منـاويـش

................................................................

ع الشـط واقفيـن بنيـــّات
كما بـــدر نايــــر جبيـنهم
يـــارب عــــالِم بـنــيــــّات
قلبى اللى واقع جا- بينهم

...................................................

لـــو يـــضربــــك كَـفْ.. ردِّه للـردى سبعيــن

وامشى مع الحُر لو بَـــدل السبوع سبـعيـن

ارفـــع جبـيـنـك وخلّــيك فى البــرارى صقــر

ولا تخشى من فقر لو ليك الزمان ساب عين

............................................................

يمـوت النايـاتى ويفضل نـوحُـه بنايـاتـه

واللى بنَـى بيـوت لابــُد يفــوت بناياتـه

الوقـت جبــار وف خيـام الغلابــة يبــات

وابـو البنـات يخطفُـه ويـفوت بـنــيــّاتُـه!!

..........................................................
ليه الحمام ع الحيطان ناح
وهجر قـــدوسه وبراجـــه
مين اللى جاله وقال حاح
كان نفسه ياخد مهاجـه !!

..............................................
..........................................
عادل صابر

عدد المساهمات : 193 تاريخ التسجيل : 24/01/2012

أمــدح وصــلــي وســلــم
عــلــى شــفــيــع الـبــرايــا
ف الـشــدّة هــو اللــي ســلــم
و ع الــحــق واقــف بــرايــا
........................................

صاحبى اللى مَهرى عشانا
ف وشــــى بــابــــهُ دا رده
زمــــان قَسَــمـــنا عـشــانا
مــا قـــدرش دلــــوك دا رده

...............................................

اســـتغفر الله وصـــالح
كل اللى تاب ولا عـــاد
اهى ناقه كانت لصالح
لا خلت ثمود ولا عـــاد
...........................

قالــوا البنون ولا مـــــال
وميـــــن بـلاهـــم بـيحـى
زكــــريـا يدعـى ولا مـال
بشــارته كانـت "بـيحـى"

........................................

مــحــروم و بــادعــي يــهــادي
"خــلــيــل " دعــاهــا و " هــاجــر"
شــوف ربــك أمــا يــهــادي
" ســارّة " تــخــلّــف و " هــاجــر"

.............................................

الشـــعـر لابيـض غـزلنى
ف العشـــق خسـر قضايا
ياما فـــردنى وغــزلــنـى
خـــلانى اعـشـق قضــايا
............................................

اهــــــو جـنى منـك ولـى
ولصـبـحــى ليـلك يعـــزم
ملبـوس عــاوزلى ولــى
عليـــه يقــــــرا يعـــــزم

........................................

الــقــلــب لــو يــعــشــق يــلــيــن

و الـمــيــه بــتــفــتــت حــجــر

ربّـــك ان يــرضــى يــعــيــن

و لا راحـــة تــفــرق مــن ســفــر

..........................................

لــو أقــول الـحــب ديــن
و الـعــشــق ســنـة أنــقــتــل
لــو أقــول الـود فــرض
أو أصـــون الـفــجــر عــرض
الـشــوك فــي أرضــي يــنــشــتــل
قــلــت أقــول عــنّــي و عــنــك
و ســبــنــا مــن كــل الــبــشــر

...........................................

يانايمه وساكته قوليلى
ليه فاتحه ديما حصونك
دا لو اشتروكى بلولى
ما حد غيرى يصـــونك
..................................................

رمضان هـلالك وبنور
زينّا والـله جمعنــــــا
بيضا قلـــوبنا وبنــــور
ياللى جمالك جمعنا

...................................

"أيــوب" ف بــحــرك دا صــابــر
و ف بــطــن حــوتــك دا" يــونــس"
يــاللــي مــنــجــي اللــي صــابــر
دعــاك و ذكــرك دا يــونــس

.............................................

ســلام بنـدعـــى ولا دم
دعـــوة لعــادى ونـاســك
يا دنيـــــا واحـنــا ولا دم
لا تـقـولى ناسى ونـاســك

.....................................................
....................................
خالد الطاهر

» فن الواو والمربعات مربعات من فن الواو
» من فن الواو والمربعات
» فن الواو والمربعات
» من فن الواو والمربعات للشاعر خالد الطاهر
» فن الواو والمربعات للشاعر عادل صابر