" حوار عاطفي "
للشاعر عادل صابر
.........................................................
الشاعر عادل صابر من أشهر شعراء المربعات في صعيد مصر ،
وهذه واحدة من قصائده بعنوان " حوار عاطفي "
هو:
مشتاق وقلبي مكن دار
والحب دوب جداره
لولاكي قلبي ما كان دار
ولاحد غيرك جا- داره
هي:
رايداك وقولك عاجبني
ع البعد حبي بدا- لك
لو اكلها بالزيت ع جبني
ماحد ينفع بدالك
هو:
قلبي هجرني وجه لك
ماانتي زماني ووجودي
عاشقك بعلمك وجهلك
يا بنية حني وجودي
هي:
كيف سبع فــ الصحرا وعران
يازاين اهلك وجيلك
لولا ابويا عارفاه وعران
لاهجر ديارى واجيلك
هو:
لاحن قلبك ولا طل
والسهد حرَّق عِيوني
سيباني فــ البرد والطل
والشوق في قلبي عَيوني
هي:
في البحر راميين شبكنا
لكن ماطلعوا بصيرة
ياما بالعيون اتشبكنا
بس الأيادي قصيرة
هو:
العشق يشبه لسكين
يزمن جروح الجراحى
يامبلي بالعشق مسكين
م العشق عمره جا- راحة
هي:
طول عمري أقاسي هواني
والشوق بحوره غوارق
فيه 1000عاشق هواني
والقلب لما غوا- رق
هو:
ياام الايشارب اللموني
والتوب في خصرك حلا- لي
مهما الخلايق لاموني
انتي نصيبي وحلالي
هي:
لو أنوي ع الحب ملاهيش
ولاحد يعلم سرايا
معاك انا اسكن في بيت هيش
مش عايزه عزبة وسرايا
هو:
عارفاني دايما ولد زين
حافظ الأصول والجمايل
لاأعرف الهلس والزين
ولا مرة قلبي جا- مايل
هي:
عارفاك وعليا صعبان
والصبر ليك والجلاده
ياحبيبي كل اللي صاع-بان
ولاعمره قلبك جلا- ده
هو:
نفسي ونفسي ونفسي
وانظر بعيني مقدَّر
والدنيا كتمالي نفَسي
والفقر ع الناس مقدَّر
هي:
الفقر عمره ماكان عيب
والخلق مش بالمظاهر
فيه زول لابس حرير عيب
وسط الخلايق ماظاهر
هو:
الدنيا برضك مراتب
القصر تساويه بعيشه؟!!
تفتكري يكفي المراتب
في زمن صعيب المعيشة
هي:
اسكن في عشة ولا-انيش
اخدلي راجل مااحبَّه
لاعايزه تسريحه ولانيش
انت السكن والمحبه
هو:
فيه خلق عايشه على القِل
في الخيمه محلا غناهم
في الهم لا تشيل ولا تقل
والحب وحده غَناهم
هي:
وفيه ناس ما أوسع خلاهم
عربية وفلوس وشقه
والحب لما خَلاَهم
صبحت حياتهم مشقّه
هو:
كل الأمور متقضية
ياللي السنين قلَّبوكي
حادخل ولا في100قضية
لوحد راح قال لابوكي
هي:
حيرتك في قلبي تعللي
بالجد عينك فواتح
هات ابوك ياللا وتعَللي
مع ابويا اقرا الفواتح
_________________