فن المربع
مربعات الشاعر عادل صابر الملقب بامير الواو
*****
عمري السنادي بلغ واحد وخمسين موت
تطرح عيوني بُكا ، يحصد لساني سكوت
حبل الإرادة فلتني جوا بحر الشر
يونس لقي البر ، وانا لسه في بطن الحوت
*****
البير نشف والمزاير كرهت المـــيه
والفخ منصوب في حنكه ألف قمريه
رضعوا عيال نجعنا بز الوجع ع الريق
والحلم فوق الطريق، مقتول بلا ديّه
*****
لا معاي عصاية الكليم ولا جُبة الحلاج
ولا ليا سلطة يسوع ع البحر لو يوم هاج
أنا بس هدهد سبأ جاني بأمر خطير
عن خلق عبدوا القدير ، وقتلهم الحجّاج
******
ماتعشموش بالولد ، ولا تطمعوا في الدار
ولا تبقوا زي السمك لما توهمه الأنهار
الدنيا وردة شيطان خاينة وريحها عفن
ميت في توب الكفن ، يضحك على الفحّار
******
فرح الإبر يبتدي بعد احتضان الخيط
ولا معنى للطوب إلا في انتصاب الحيط
قيمة العباية بتاجي من عذاب الصوف
ومن دموع الشادوف ، تاجي ابتسامة الغيط
******
سبنا الطريق العِدِل ، ونقول زمان مقلوب
نرمي التهم ع البري ونبرِّأ المعيوب
غاطسين في طين الذنوب وعشمنا في الجنة
وان خسَّع البَنّا ، بيجيب الغلط ع الطوب
*******
الفـاء في فُـجر افتحها..حيطلع فَجر
والدال في قـدَرنا .. سكِِّنها حيطلع قدْر
حاجات كـتيرة بتحـلا بعد تشـكيلها
يتفَـك ليلها، ويتحَـوَّل هِـلالها لبدْر
*******
وقف وقال حاح وسمعها الغراب لم فر
وضرب بمقلاعُه ولا خوَّف حدادي البر
مش كل حرّاس على غيط الوفا يحاحي
ولا كل صاحي ، بيحمي النعسانين م الشر
*****
من دون عساكر الحرس حرماني م الاجازات
الناس تزف الفرح وانا اشيع الجنازات
في عز برد الشتا باغسل صحون ميزك
من بخل جميزك ، أنا وشي اتملا حزازات
*****
وان جف نهر الأمل ،رزق الشبك ما يضيع
وان عشّموك بالقمر ، شمعة هواك ما تبيع
وان راودك حلم ماتقولش دا فين ومِـتى ؟
لوِّن حيطان الشتا ، وانقش عليها ربيع
*****
غرزت جاموسة الغلابة وحزنت المواجير
وابن الأصول اشتغل عند الهفايا أجير
حظ البليد انتصر ع اللي قرا وكتب
واللي احتمى بالخشب ، يستحمل المناشير
*******
لا تسألوا النار : ليه تعشق صراخ القِدْر؟
ولا تسألوا العود : ليه يحمل ذنوب الجِدْر؟
وان كان صاحب السؤال أعلم من المسئول
ماكَنْش موسى الرسول ، طاع وامتثَل للخِضْر
******
لا تُفـرُط القِـلْـع ، إلا لو طابتلك ريـح
ولا تطلب الوِد لو كف العَطايا شحـيح
إشرب نزِيز البـِرَك من قلب شوك وعطن
واوعى تدوق اللبن ، من بـِز عاصي قبيح
*******
دنيا غروره ندوق فيها العسل نتسَـم
ولا عادشي فيه فرق مابين الفَـرَح والهم
في بَحِّة الناي متدّاري الصـراخ بنغَـم
والشهوة نوع م الألم ، والحِنّة لون الدم
******
أنا حِكمِة الخِِضْر، ولاّ سفينة المساكين ؟
ودي طلْعة الفجر، ولاّ لمْعِة السكاكين
أنا سَـيِّد المقهـورين، ليّا كتير أتباع
أنا حلم متباع ، ومتفرِّق على الدكاكين
***********
فيه ناس ماتت وسـابت للأحِـبّة بيوت
وناس مـاتت وسـابت للعـيال نَبّوت
فيه ناس كيف الكلاب، ماتفوت غير النَز
وناس كما القَز ،تكسينا حرير وتموت
*********
رحاية الهم على حلم الفقير بتلف
لا الهم واقف ولا حمل الفقير بيخف
والدنيا سكة وبا واللي سلكها هَلك
واحترنا حيرة السمك ، لما البرك بتجف
******
شوقي لشوقِك يكون رايح يقوم راجع
وبقيت في شرْع المحبّة الثاير الخاضِع
دا انا قلبي مفتاح ومستنِّي حنين القِفْل
وصبَحت كما طفل، لا مفطوم ولا راضع
*****
مهما تزَعبِِّل على عيون الوطـن زعـابيل
لسّه فْ غيطان الـدُرة بتزغرِت القـناديل
وان زادت الريح ما تقلَع غير هزيل الشَـتْل
واحنا شجر أتْـل ، راضِـع من عكار النيل
******
*****
جينا لدنيا التعـب ،لا لقينا مال ولا ورْث
مَيِّتنا عِـكرة ، ولقمتنا بقلْـع الضـرس
إحنا حمـير الفَـرَح ياما مشينا سِـكَك
حوَّلنا كل الدِكَـك ،ولا دُقْنا كحك العِرْس
******
إرمح يا ظالم ورب العَرش بالمرصـاد
عايش في وهمَك وانت الصايد المنصاد
توبك كفـانك ، وبيتك زنقـة البورة
دنيا غَرورة ، بتفنِي القمـح والحصّـاد
******
الواطي مهما عِلِي ، يغلب عليه الطـبع
وان تفسد الميه لا ترمي العتب ع النبع
إمشي مع الوقت واعمل للخيانة حساب
واحذر فِـعال الكلاب ، لما يموت السبع
******
مش شرط تبقى العطايا من رضا العاطي
ولا تحسب الستر يوم تشجـيع للخاطي
فاوعى تفكِّـر يا عاصي بالمعاصي تنوُل
معروف بإنْ السيول ، بتحُط في الواطى
******
مستني ليه الحصاد يا غشيم وأرضك بور
وبتشكي م الحر وانت مولِّع التنور
مالك بجرن الأمل يا مبحشك الأحلام
دا اللي رضي بالضلام ، مالهوش نصيب في النور
******
السكة عميه مشيت على راسها ماشافتنيش
والبحر أطرش زعقت في ودنه ماسمعنيش
سألت عمي الولي دنقّر وقال موجود
والغفلة مش م الوجود ، الغفلة م الدرويش
*****
الشِلْب مكار بغشَم الصيادين ماياجيش
وان صادف الحـــظ سهم الأغبيا مايطيش
فيه ناس بترمي الشبك يطلع بَشوُش بسمك
وناس بترمي الشبك ، يطلع بطين وحشيش
********
إفتل حبال الوفا، لو بان جفا من خِل
وافتح خديم العطا ، يطفي نيران الغِل
لا شُفنا كومة سبَخ محرومة م القمرة
ولا شفنا يوم شجرة ، حرمِت بخيل م الضِل
**********
قلتلُّه جاي بالركوبة ؟ قاللي داي ماشى
قلتلُّه جبت العسل؟ قاللى حداي ماشى
قلتلُّه طالع مغرب ولاّ رايح الشرق
قاللي مفيش فرق ، طول ما الدنيا دايماشى
******
إيه اللي على فرشتك، سكر يا خال ولا ملح
وإيه اللي على جبهتك ،أثر الصلا ولا جرح
ميّل عليا وبكى ونطق بدمعه وقال
إيه بس ذنب العيدان لما يخونها الطرح
******
سألته أيه ثروتك ؟ قاللي عظيم يا وطن
سألته إيه بلوتك؟ قاللي قديم يا عطن
سألته إيه غنوتك عن عزة الإنسان
إتحاش معاه اللسان ، حاول يغنّي رطَن
*******
غريب يا طبع النسا ، على كل لون يقلب
مرة تلاقيهم دهب، بس الصفيح يغلب
فيه منهم المخلصة حتى ان راجلها غدَر
وفيه شبيه البقر ، لو شاف أمان يحلب
*****
غفير بلدنا نعِس ، سرقوا العيال مرته
والغالي لمّا رخص، أهل الرخيص شرته
والجرن ليلة شتا جاله الردي وكبَش
والغيط في وقت الغبَش، تعرفش مين حرته !!
*****
فِجّوا حَشا الأرض واشـتلوا قلبكم فيهـا
وارووا الشقوق من لبن قواديس سواقيها
غنّوا لنزْف الترَى ، وماتظلموش الفاس
دا الفاس أنفاس ، وجرْح الأرض يحييها
******
دوّر على الحُر لو سكن الجبل والسن
وان كتروا الاندال إوعى للندالة تحن
الناس معادن ودنيانا عبر وعلام
فيها الدهب بالجرام ، أما الصفيح بالطِن
*******
هجَرنا حضن الوطن ورجعنا بعد غياب
لقينا عود الصبا اتقرطَف وحلمنا شاب
رمحنا رمْح الجِمال ولا خدنا تمن الرمْح
وبنزرع القمح، نلقى الحصّادين أغـراب
******
كانت عيونه خلا،كان وشه ريف وغيطان
طبطبته كانت صلا،كان صوت ابويا أدان
كان زي نخل الفلا،عزوه وكرامه وضل
علّمنا ما نضل، مهما يزهزه البهتان
*******
ومهما زاد السحاب ، فيه بدر مخفي هناك
ومهما طال الغياب ، فيه ناس بتستناك
دا النخل مهما كِبر تلقاه في شيبـُه طرَح
ولا تخشى هجر البلح ، طول ما النواية معاك
********
فصّلت كِسوة لبدَني من فِــراش أيوب
وصنعت قَطرة لعيني من دموع يعقوب
شيخ الطريقة كشف لي السر في أسايا
قاللي العِناية بَلايا ، والعطايا كروب
*****
موضوع: مربعات الشاعر عادل صابر 
الجمعة فبراير 09, 2018 9:49 am