الطيب الشنهوري
اهلا وسهلا زائرنا الكريم.. تفضل بالتسجيل فى المنتدى
ادارة المنتدى / الطيب

الطيب الشنهوري

منتدى ثقافي - ديني - اجتماعي - علمي
 
الرئيسيةاليوميةس .و .جبحـثقائمة الاعضاءالمجموعاتالتسجيلدخول

شاطر | 
 

 من مربعات الشاعر عادل صابر

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
شاعر جنوبي



عدد المساهمات : 149
تاريخ التسجيل : 24/01/2012

مُساهمةموضوع: من مربعات الشاعر عادل صابر   الإثنين مايو 23, 2016 8:21 pm

من حوالى عشرين سنة طلب منى الكثير من مزارعى بلدتنا ان اكتب بعض المربعات على رخص الطماطم اللى بلطت البيوت ، فكتبت هذه المربعات الفكاهية بناءاً على رغبة المزارعين .
ــــــــــــــــــــــــــــــــــــــــــ
الطماطم
********
ياحَـــــــمـــرةكانــــــت أمـــالى
أفـــــرح واكــــيـــــد الأعــادى
ضيّـــــعْت عقـــــــلى ومــــالى
ولا جبتى حـــــــق العدادى(1)
ـــــ
ياما جبت ياحمرة كبريــــت(2)
والـــلــه ماخــــــلّيت شكــــــاير
والجــــــسم ولَّـــــع بكـــــبريت
ولا بيّا جـــــــوع العقــــايــــــر!!
ــــ
كان نفــسى اجـــــــوِّز ولادى
وابنى بفلــــــوسك عمـــــــارة
لا طُلْـــت لا- دى ولا- دى
ولا نابــنى غـــير الخــــــسارة!!
ـــــ
كام ليكى تاجـــــــر وسمـــسار
ياما ذلّـــوا بيكى خــــــلايــــق
أتاريكى فى الحلق سم سار
لجلك رهنت الخــــلايـــــــق
ــــ
ماجبتى ولا حق لانـــفــــــار
وخسارة فيكى القِــــنايـــــة
لو شمك الجحش ل..نفـــار(3)
وترَب(4) بصاحبه القنايـــــة
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
1-الأقفاص 2-نوع من المبيدات 3-نفر وتقزز 4- قفز بشدة
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
غشّتنى حُـــــــمرة خـــدودك
وخدعنى طــــــول السرايب
محروق أبوكى وجــــدودك
صبّحتى بيــــتـــنا خـرايب!!
ــــ
كان عشمى ابيعك بألوفات
مالحقت حـــــتى قروشــِك
زمنــك ياغندورة ولو-فات
بيمين لااقلِّع عــــروشـــك!!
ــــ
على قدمى يامــا مشــيتـــلك
ورقيت عليـــــكى رقــــــاوى
وحلفت تـــــــانى ماشـــاتلك
تحــــــرم عليّـــــا التقــــاوى
ــــ
ونصبت قال خيمة وشالوش!!
لجلن تكيدى عــــــزولــــك
ضحكوا حبايبى وماشالوش
ولا جُــــم فى مرة عازولـــك
ـــــ
طول عمرى متعوس وفقرى
والخيبة رفعــــــالى رايـــــــة
وحااعيش فى همى وفقــرى
طول ما الطمـــاطم ورايـــــا
كنتى زمان ناصبة ضهـــرى
كان ليكى قيمــــــــة وهيـــبة
منيكى حـــــــوّشت مـــهرى
عشقــتنى لجــــــلك وهيبــــة
ـــــ
زمن العجـــايب ما له امــان
بـيــبهـــدل الحُــــر فينــــــــا
ضــحَّك عليكى البرنجــان
وانتى ياحـمرة حـزينـــــــة!!
ـــــ
م الغلب ياحـــمرة حَـرجان
وقميصى ع الكتــف رايط
ياريتنى سُقْتِك بُرنــجــــان
لكن اعمل ايه فى الورايط
ـــــ
ياريتنى كان سُقْت قلقــــاس
ماكانشى عقلى فى وَشاشة
ولا عذت جانى ورصّــاص
ولا بلصة ساعة الــوِشاشـة
ـــــــــ
كان مالو لوسُقْت ضعضــيع
ولا دِفـــرة لجل البهــــايـــم
ماكنشى حالى فى ضعضيع
ولا عشت فى الغلب هايــم
القلــب م القــــــهر شطّـــــة
من همى يالله الســلامــــــة
بالذمّــة لــو سقت شطّــــــة
كان عشْت عيشة النــدامــة
ـــــ
الفـــقر وبرك لى فى البيت
راقـــد وفـــارد باطيــــنــــه
لا اتجــوز الواد ولا البـــت
والعجل وحـلان فى طينه!!
ـــــ
لا خدت منك ولا اديــــت
ولا لاقى حق الدقـــــايــــق
وكأن يابو زيد ماجـــــنيت
غير مسخـرة م الخـــلايق!!

ـــــــــــــــــــــــــــــــــ
عادل صابر
نقادة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
من مربعات الشاعر عادل صابر
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
الطيب الشنهوري :: منتدى الشـــــــــــعر والقصه القصيرة-
انتقل الى: