أنا بوحد خالق الناس
خلق المسلمين والنصارى
ناس نايمه على فرش وكناس
وناس ع المعايش حيارى
ــــــــــــــــــــــــــــــــــــــــ
أمدح في سيرة نبي زين
داوى الغزاله وجارها
الدنيا خمره ونبيذ زين
تسكر إذا كنت جارها
ـــــــــــــــــــــــــــــــــــــــــــ
أول كلامي حصلي
ع اللي الغزاله مشتله
واحكيله ع اللي حصلي
وازرع همومي فـ مشاتله
ــــــــــــــــــــــــــــــــــــــــ
يا طبيب عليا إلحق
وهات الدوا الـموافق
ياما ناس بتعرف الحق
ولجل الضروره توافق
ــــــــــــــــــــــــــــــــــــ
لو شفت اللي جرى فـ زمنا
عملوها ولد الأواطي
كلام العواذل زمنا
سبع الرجال جر واطي
ـــــــــــــــــــــــــــــــــــــــــ
يا دنيا همك شغلني
كمديون يسد المطالب
ناس حزينه وناس تغني
ومغلوب يضحك لغالب
ـــــــــــــــــــــــــــــــــــــــــــ
يا دنيا كم زاد عجبكي
عشنا وشفنا العجايب
خليتي الأصيل بيبكي
مسكين عدم الحبايب
ــــــــــــــــــــــــــــــــــ
دنيا علينا تربت
انظر بعينك راعيها
والعنز لما تربت
ما نطحت إلا راعيها
ـــــــــــــــــــــــــــــــــــــ
تاريها الدراهم بتنفع
تجيب بل ويا غنينه
الصاحب اللي ماينفع
البعد عنه غنيمه
ــــــــــــــــــــــــــــــــــــ
الصاحب الزين يتحط فــ الجيب
وتفج منه الروايح
الردي لما يبدي بالعيب
ماتجي منه غير الفضايح
ــــــــــــــــــــــــــــــــــــــــــــــــ
ليه يا طبيبي تاكلني
ضاقت معايا الخليقه
أروح للوحوشه تاكلني
ولا عوزتي للخليقه
ـــــــــــــــــــــــــــــــــــــ
زمنا زمن التقاليب
أقلب مالاقي بصاره
العنز تجري ورا الديب
والسبع كلته الحماره
ـــــــــــــــــــــــــــــــــــــــــ
بدل الأرايل بقي دش
ومنه تشوف العجايب
الفقري ليه راديو بيدش
حتى محطه ماجايب
ــــــــــــــــــــــــــــــــــــــــــــ
فايته البنيه بخلخال
تخطر كما فرع مايل
عشق البنيه يا ابو الخال
عامل في قلبي عمايل
ــــــــــــــــــــــــــــــــ
موضوع: من أجمل الواوات 
الأربعاء يناير 06, 2016 3:07 pm