مع الشاعر عبيد محمد خليل
( أبو عدنان )
أحوال الدنيا تعلي
ولابد نرضى الحقيقة
طول العمر نبني نعلي
وتهده كله ف دقيقة
.....................................................................
المولى سبحانه خلقها
تعب وهم ومشاكل
دايما تغير خلقها
وكل اللي فيها مشى كل
.....................................................................
للندل توبك فرشتيه
وف جيبه كترت فلوسه
والحر ع الشوك فرشتيه
رمتيه للناس تدوسه
.....................................................................
الفرح فيها عزا بات
وكل اللي فيها جا رايح
كفايه هم وعذابات
والقلب كله جرايح
.....................................................................
الندل دايما تعليه
وتخلي كدبه حقايق
والأصيل دايما تعليه
كرهتي فيه الشقايق
.....................................................................
الله يا دنيا عليكي
لما بان كدبك وغشك
أصبح واطيكي عاليكي
والندل تديله وشك
.....................................................................
يا بدر ليلي على طال
وبحوره مالها مواني
ما بان خلي ولا طال
حالف عشانه ما واني
..................................................................
في الحسن باين ومعروف
اللى منه زادت ألامي
يكن لك معاي إنت معرف
تبلغ عيونه سلامي
.....................................................................
جاني جوابه مع الطير
أنا قلت خلي وصالي
باعت يقوللي مع الطير
م اليوم انسى وصالي
.....................................................................
يا حلوة داري شعورك
الحسن بان من عنيكي
أنا نفسي أعرف شعورك
لو كان أمري عانيكي
.....................................................................
ياحلوة حبل المودة
أبدا منك ما واصل
والفكر جايب وودا
حالف عشانك لواصل
.....................................................................
جميل وف الحسن باين
و ع الخلق سايق دلاله
وعن عيني شارد وباين
والقلب حاير دلاله
...................................................................
قالوا طبيبكم جا روحوا
يمكن بإيده عمايل
لقيناه ملهي ف جروحوا
مهموم والبخت مايل
.................................................................
الليل كله بعاني
وما حد سامع آهاتي
حتى الأحبه باعوني
وسابوني وحدي أهاتي
.....................................................................
مال الندل يا بني دا ملعون
دايما ف عمل الفجاره
والاصيل ماله دا مال عون
في الشده بيبان ف جاره
.....................................................................
حبل الندل يا بني دا واهي
والوصل منه قطيعه
مشيه يجيب لك دواهي
سيبه جاته قطيعه.
......................................................................
العين تبكي معاي دم
مع الندل بمشي ليه آنا ؟
دا جميلي كان المقدم
ورجعتلي منه الإهانه
.....................................................................
كان صاحبي صاحب غنامات
قوم الحظ م الدنيا يدي
لما قلبه من الغنى مات
مد لي قاللي بوس يدي
.....................................................................
يا دنيا خفي حمولك
أنا جنبي مله فراشه
نيران والعه وحمولك
والورد يلعن فراشه
.....................................................................
للصبر جبت التقاوي
وف قلبي زارع غيطاني
ظلماني وبرده تقاوي
والظلم منك غطاني
.....................................................................
ليه الحظ يا ناس سه مان
والريق في الحلق جافي
رمتني الرديه بسهمان
والسهم لفلف وجا في
موضوع: واوات الشاعر عبيد الله محمد خليل ( أبو عدنان ) 
الجمعة أكتوبر 07, 2011 3:18 pm