الليل مهما طال هايعدي
****************
شعر: عبدالجواد خفاجى
باطل ولاَ بطل ؟
مش هافوِّض
مش رايح أحبك
مش رايح أقرقش لك زلط
مكتوب على جبينك غلط
والطبع خايس وخاين
والمهرة مش للخسيس
واللى حِبْلت أمه بالغلط
*************
رغم الشهود، و العقد والمأذون ،
والعزايم ،
والطبالين
والزمارين
والرقصات والرقّصين
والسكرجي والمأفون
رغم الكلاب اللى بتشمشم في عضم الدبايح
والدم اللى سايح
والديابة الى حضروا الفرح
واللى طفحوا ، وشربوا من دمي
رغم الحشاشين، وكيِّفةِ الأفيون
باطل زواجك يا بطل!!
وابن الفطيس اللى كَتَبْ
مملوك ..
وخْدِينه مَخْـلَصْ حَقْ
في الأصل كان مرهون
********
ربي خصيمك
وقلبي
والفرَحْ
والدَّم اللى سال
دمي
ليلك فَرَحْ ؟!
والمغنى اللى طال ،
حزَّمت وسطك ،
وشمرت ـ يا ابن الرقاصين ـ كمك ؟!
الصبح يجمعنا
واشمِّر ـ يا ابن الفطيس ـ
كمِّي
هاتشوف الزند الأصيل
زندي
والليل ـ مهما طال ـ
هايعدي