طعم المش
________________
(الشاعر مدثر هاشم عبد العزيز )
________________
الواد بيقولها يامة احكيلي حكاية
قبل منام
زي اما بتحكي لخويا اسلام
زي اما تلاعبي زمان ف سهام
و تقوله يا بني
انا اصلي يا شقيت
و الصبح يصبح
و اناهلكانة في شغل البيت
وعيال في البيت عمالة تزيط
و كمان في يبني زعيق وصويت
مش باقي يبني كلام يتقال
و الست الحاجة ف عز الصبح
بتفطر مش
و بسأل طول اليوم جواها سؤال
إيه اللي مغير طعم المش
و الملح يا بنتي ناقص تزبيط
أصل التظبيط دا الفن
الخاص بسيادة البيه
بيعشم كل الناس ف جنابه
عشان تديه
و ان اللي اختاره
يلاقي الخير ف ايديه
ووعود ووعود
و الكل مفيش
حوالين البيت
كان واقف يبني ألف شويش
لو رحت هناك
راح توقع حالا
ف التفتيش
تفتيش تفتيش
ووراه تفتيش
و البيه لو كان
من قبله يبان درويش
حتلاقي الكرسي كمان خلاه
أستاذ علامة ف التطنيش
ولا يسمع أى كلام يتقال
و الست الحاجة بتفطر مش
و بتسأل طول اليوم
جواها سؤال:
ايه اللي مغير طعم المش
و اوعاك يا بنتي تكوني
اديتي منه هدية
لا لعم جمال و لا ابله هنية
بس انا مش بعرف
ادي هدية زي البيه
60 مليون و الراجل ماشي مبانش عليه
و كمان كام ألف عشان الأولاد
عشرين مليون
ف الزينة لحرمة سعاد
ميهمش كام حيجوعوا
ف التعداد
و الا ان الباشا بياكل
حق عباد
مش باقي با بني
كلام يتقال
دا الست الحاجة بألف سؤال
أنا يامة و الله مكنت بغش
ولا كنت بقلل يمة الملح ف يوم
بس اصل البيه كان لما يقوم
مش كان يكفيه البيض ف العش
ولا طن اللبن الصبح وفوقه الوش
بس اصله استكتر يمة علينا
ملح المش